Excursión fin de curso

Excursión fin de curso

Os pasados días 7, 8 e 9 de xuño os nenos e nenas de 4º, 5º e 6º viaxaron ata Santiago e as Rías Baixas para disfrutar da excursión de fin de curso.

 Día 7: Tramo do Camiño do Monte do Gozo ata Santiago. Visita aos tellados da catedral, museo das Peregrinacións e paseo pola zona vella e Alameda. Noite no albergue do Monte do Gozo.

Día 8: Parque de aventura de Marín. Paseo en barco, dende o porto do Grove, con degustación de mexillóns e baile. Visita á Illa da Toxa . Noite nun hotel en Meaño.

Día 9: Zoo de Vigo. Visita campo da Madroa (Celta de Vigo). Tarde na praia de Vilagarcía. 

Visita ó mercado e actividades en Vilalba

O pasado 23 de maio os nenos e nenas de primaria foron de excursión ata Vilalba para participar en actividades como a búsqueda dun tesouro e visitar o mercado.

Excursión a Ribadeo

REDACCIÓN: 5º E 6º

O venres, 2 de xuño, os nenos e nenas do CEIP Monseivane, acompañados dos nosos mestres, fomos de excursión a Ribadeo, punto do Camiño Norte.

Primeiro dirixímonos cara a Foz, visitamos a Basílica de San Martiño e collemos o tren cara a Ribadeo. Gustounos moito porque a maioría nunca foramos en tren.

Cando chegamos a Ribadeo paseamos por pé da ría vendo: a ponte dos Santos, o albergue, o Cargadeiro, o reloxo de sol, os restos da muralla e o Forte de San Damián. Tamén aproveitamos para merendar e coller forzas para seguir disfrutando da excursión.

Máis tarde, collemos o autobús ata a Illa Pancha onde observamos os dous faros, un deles reconvertido en hotel. Fixemos fotos e xogamos un pouquiño xa que facía moi bo tempo.

A continuación regresamos ao centro de Ribadeo para dar un paseo polo casco histórico. Na praza de España vimos o Pazo dos Ibáñez, que hoxe en día é a Casa do Concello, a Torre dos Moreno, a Igrexa de Santa María do Campo e o Convento de Santa Clara. Dirixímonos cara o mirador da Atalaia e alí baixamos no ascensor panorámico ata o Porto Deportivo. Volvemos a subir nel e voltamos ó autobús.

A última parada da excursión foi pé da Praia das Catedrais onde xantamos todos xuntos, xogamos un pouco e fixemos fotos da praia. Por último, regresamos a Moreda cansados pero moi contentos polo ben que o pasamos e o moito que aprendemos.

Letras Galegas

O venres, ademais da festa dos Maios, festexamos as Letras Galegas homenaxeando a Carlos Casares.

- Os alumnos e alumnas de 5º e 6º leron a súa biografía o obra e expuxérona nun mural cunha árbore chea de laranxas, simbolizando o libro do autor titulado "As laranxas máis laranxas de tódalas laranxas".

-Os nenos e nenas de 1º e 2º colaboraron no mural ca figura de Lolo contando a súas historia, de acordo co libro "Lolo anda en bicicleta".

- Os rapaces e rapazas de 3º e 4º engadiron unha galiña azul con información do libro de Carlos Casares. Tamén colocaron o nome e apelido no mural.

- Os máis pequenos do colexio debuxaron o can Rin e o lobo Crispín e contaron o conto, ademais de colorear a caricatura do autor.

Por último, o alumnado de 1º a 4º representou unha obra de teatro basada no libro de Carlos "A galiña azul". 

Festa dos Maios

O pasado venres, 19 de maio, festexamos a tradicional Festa dos Maios. Os alumnos ían ataviados con coronas de follas de loureiro e as nenas con saias de cores, coronas de flores e colgantes. Tamén levaban cestos con pétalos para tirar aos reis.

Primeiro, fíxose un desfile por fóra presidido polo maio, este ano tratábase de Gali-leo, a mascota da biblioteca. Despois, seguíano os reis e varios nenos cos monumentos feitos para o entroido e cheos de flores para a ocasión. E, por último, no desfile non faltaron pais, nais e familiares.

A continuación, no pavillón tivo lugar a festa. Non faltaron as danzas ou muiñeiras, as cancións, bailes e outras actividades como a realización dunha espiral (simboloxía do camiño), feita con pedras pintadas polos nenos. Para rematar a festa os nenos fixéronlle a reverencia aos reis e tiráronlle pétalos.

E isto non foi todo porque tamén fixemos, na entrada do colexio, unha alfombra floral con temática xacobea, de acordo co proxecto que estamos a traballar.

Carreira Letras Galegas

O pasado martes, 16 de maio, o alumnado do CEIP Monseivane participou na Carreira de Letras Galegas celebrada en Vilalba. No caso de quinto e sexto vemos os participantes na imaxe inferior. María Ramudo obtivo o primeiro posto na súa categoría. PARABÉNS A TOD@S!!