Nesta última semana do curso demos fin ao noso proxecto bienal "A volta ao mundo". Fixémolo cunha ruta polas aulas e unha posta en común na que cada grupo foi explicando ao resto de compañeiros algunhas das moitas características que aprenderon ao longo do curso sobre os países traballados.
Comezamos o noso itinerario pola India guiados polo alumnado de educación infantil.
A continuación visitamos Xapón co alumnado de 1º e 2º, que nos puxo ao día dalgunhas das particularidades do país do sol nacente e a súa cultura.
Máis tarde dirixímonos a China. Alí, as nenas e nenos de 3º e 4º, guiáronnos polo xigante asiático contándonos un montón de cousas sobre o país máis poboado do mundo.
Por último, o alumnado de 5º e 6º trasladounos ata Estados Unidos para explicarnos algunhas das características deste país tan diverso e cheo de contrastes.
Así puxemos o punto e final a unha intensa viaxe, que dura xa dous cursos, e na que ampliamos os horizontes cotiás dun centro educativo para abrir unha fiestra ao amplo mundo que nos rodea.
Emprenderemos novas aventuras, quen sabe cara que destino.
ACOMPAÑÁDESNOS?
Ningún comentario:
Publicar un comentario